آٹھ ماہ کے دوران 6 ارب 67 کروڑ 80 لاکھ ڈالر کا بیرونی قرض لیا گیا


اسلام آباد: رواں مالی سال کے ابتدائی 8 ماہ میں پاکستان کو 6 ارب 67 کروڑ 80 لاکھ ڈالر بیرونی قرض حاصل ہوا ہے جو کہ اب تک کے بجٹ تخمینے سے کم ہے۔

اقتصادی امور ڈویژن کی جانب سے جاری کی گئی تفصیلات کے مطابق رواں مالی سال کے پہلے 8 ماہ میں پاکستان کو 6 ارب 67 کروڑ 80 لاکھ ڈالر بیرونی قرض حاصل ہوا، جبکہ رواں مالی سال کیلیے 17 ارب 38 کروڑ ڈالر سے زیادہ بیرونی قرضوں کا تخمینہ لگایا گیا ہے۔

اس طرح پاکستان کو اب تک بجٹ تخمینے سے کم قرض موصول ہوا ہے، جولائی تا فروری 84 کروڑ 80 لاکھ ڈالر کا دو طرفہ قرض موصول ہوا، جس میں سے سعودی عرب نے پاکستان کو 59 کروڑ 51 لاکھ ڈالر تیل کی سہولت کیلیے فراہم کیے، اسی طرح چین نے 6 کروڑ 73 لاکھ ڈالر سے زیادہ کا قرض دیا ہے۔
دوسری جانب نیا پاکستان سرٹیفکیٹ سے 68 کروڑ 68 لاکھ ڈالر سے زیادہ حاصل کیے گئے جبکہ 2 ارب ڈالر ٹائم ڈیپازٹ کے تحت موصول ہوئے۔

اپنا تبصرہ بھیجیں